មរណសាក្សីដ៏គួរអោយគោរព លោក ចន និង អ្នកដែលនៅជាមួយគាត់ក្នុងសង្ឃស្ថាន សត្តសាវ៉ាដ៏វិសុទ្ធ ដែលនៅជិតក្រុងយេរូសាឡិម
THE VENERABLE MARTYR JOHN AND THOSE WITH HIM FROM THE MONASTERY OF SAINT SAVA THE SANCTIFIED NEAR JERUSALEM
គ្រីស្តសង្ឃស្ថានដ៏រុងរឿងនេះ នៅតែមានរហូតដល់សព្វថ្ងៃនេះ ហើយត្រូវបានសត្តសាវ៉ា (Sava) នៃប្រទេសស៊ែប៊ី មកទស្សនា និងបានទទួលការឧបត្ថម្ភពី មេដឹកនាំ ប្រទេស ស៊ែប៊ី ពីរ បីនាក់ដែរ។ គ្រីស្តសង្ឃស្ថាននេះ ត្រូវបានវាយប្រហារ លុកលុយ និងបំផ្លិចបំផ្លាញដោយពួកអារ៉ាប់ដ៏ឃោរឃៅជាច្រើនដង។ ប៉ុន្តែ ដោយសារជំនួយផ្គត់ផ្គង់ពីព្រះជាម្ចាស់ វាត្រូវបានស្ដារឡើងវិញ និងថែរក្សារហូតមកដល់សព្វថ្ងៃនេះ។
ក្នុងរជ្ជកាលរបស់អធិរាជ កុងស្តង់ទីន (Constantine) ដែលជាបុត្ររបស់ មហាក្សត្រី អៀរីន (Irene) គ្រីស្តសង្ឃស្ថាននេះត្រូវបានវាយប្រហារ និងលុកលុយដោយពួកអារ៉ាប់។ ពួកសង្ឃមិនបានចង់រត់គេចពីកន្លែងនោះទេ ប៉ុន្តែពួកគេបានពិគ្រោះជាមួយលោកឪពុក ថូម៉ាស់ (Thomas) ហើយគាត់និយាយថា៖
«យើងបានរត់ពីលោកិយ មកកាន់ទីវាលរហោឋាននេះ ដើម្បីសេចក្ដីស្រឡាញ់ចំពោះព្រះគ្រិស្ត អញ្ចឹងវាជាការអាម៉ាស់ប្រសិនបើយើងរត់ចេញពីទីវាលរហោឋាននេះដោយសារការភ័យខ្លាចមនុស្ស។ ប្រសិនបើយើងត្រូវបានសម្លាប់នៅទីនេះ នោះយើងត្រូវបានសម្លាប់ដោយសារសេចក្ដីស្រឡាញ់របស់យើងចំពោះព្រះគ្រិស្ត យើងបានមករស់នៅទីនេះដោយសារព្រះអង្គ។»
ដោយបានសម្រេចចិត្តយ៉ាងនេះ ពួកគាត់បានរង់ចាំពួកអារ៉ាប់ដែលប្រដាប់ដោយអាវុធ ប៉ុន្តែពួកគាត់គ្មានអាវុធជាប់ខ្លួនទេ ដូច្នេះពួកគាត់គឺដូចជាកូនចៀមដែលនៅមុខសត្វចចកអញ្ចឹង។ ពួកអារ៉ាប់បានសម្លាប់សង្ឃខ្លះដោយធ្នូ ហើយខ្លះទៀតពួកគេបានបិទឃុំឃាំងនៅក្នុងគុហា សត្តសាវ៉ា។ បន្ទាប់មក ពួកអារ៉ាប់បានដុតភ្លើងនៅមាត់គុហា ហើយពួកសង្ឃបានអត់ដង្ហើមស្លាប់ដោយសារតែផ្សែង។ ដូច្នេះពួកគេជាច្រើនបានស្លាប់ជា មរណសាក្សីនៃព្រះគ្រិស្ត ហើយបានទៅកាន់ព្រះនគររាជ្យរបស់ព្រះអង្គម្ចាស់ដែលពួកគេបានស្រឡាញ់ ហើយដោយសារសេចក្ដីស្រឡាញ់របស់ព្រះជាម្ចាស់នេះហើយដែល ពួកគាត់បានស្លាប់។ ពួកគេបានទទួលការឈឺចាប់ដ៏ថ្កុំថ្កើន មុនពិធីបុណ្យ ប៉ាស្កា (Pascha) [ពិធីបុណ្យរស់ឡើងវិញរបស់ព្រះគ្រីស្ទ] ក្នុងឆ្នាំ ៧៩៦ នៃគ្រិស្តសករាជ ក្នុងរជ្ជកាលរបស់អធិរាជកុងស្តង់ទីន និង ម្តាយរបស់គាត់ ឈ្មោះ អៀរីន និងសម្ដេចប៉ាទ្រីអាក្ខ នៃយេរូសាឡិម ឈ្មោះ អេលីយ៉ាស (Elias)។
ការដាក់ទណ្ឌកម្មដ៏សាកសមបានកើតឡើងយ៉ាងឆាប់រហ័សដល់ពួកចោរឈ្លានពានទាំងនេះ។ ពួកគេបានត្រឡប់ទៅកាន់តង់របស់ពួកគេវិញ ហើយបានចាប់ផ្ដើមឈ្លោះប្រកែកគ្នា ហើយបានវាយប្រហារគ្នា និងសម្លាប់គ្នាទៅវិញទៅមក។។
ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ) 