សត្តីមរណសាក្សី ម៉ាត្រូណា (Matrona) ដ៏វិសុទ្ធ
THE HOLY MARTYR MATRONA
សត្តីម៉ាត្រូណា (Matrona) ជាក្មេងកំព្រា ធ្លាប់ធ្វើជាអ្នកបំរើក្នុងផ្ទះជនជាតិ យូដាម្នាក់ នៅក្រុងថេស្សាឡូនីក (Thessalonica) ។ ប្រពន្ធរបស់ជនជាតិយូដានេះ ធម្មតាតែងតែជេរប្រមាថសត្តីម៉ាត្រូណាដោយសារជំនឿរបស់នាងទៅលើព្រះគ្រីស្ទ។ នាងបានព្យាយាមពន្យល់ឱ្យសត្តីម៉ាត្រូណា បដិសេធព្រះគ្រីស្ទ
និងឲ្យចូលរួមការជួបជុំនៅសាលាប្រជុំ (synagogue)។ ប៉ុន្តែសត្តីម៉ាត្រូណា ដ៏ស្លូតបូតបានបន្តធ្វើការងារដោយយកចិត្តទុកដាក់ ហើយមិនបាននិយាយអ្វីទៅកាន់ចៅហ្វាយនាងឡើយ។ ហើយក្នុងភាពស្ងៀមស្ងាត់ នាងបានអធិស្ឋានទៅកាន់ព្រះគ្រីស្ទជាព្រះអម្ចាស់។
នៅថ្ងៃមួយ ប្រពន្ធជនជាតិយូដានេះ បានដឹងថាសត្តីម៉ាត្រូណា បានចូលរួមការជួបជុំនៅព្រះសហគមន៍ ដោយគ្មានការអនុញ្ញាត។ នាងបានសួរទាំងពេញកំហឹង ទៅសត្តី ម៉ាត្រូណាថា ហេតុអ្វីបានជានាងមិនទៅចូលរួមប្រជុំនៅសាលាប្រជុំ។ សត្តីម៉ាត្រូណា បានឆ្លើយថា៖ «ព្រោះព្រះអង្គម្ចាស់គង់នៅក្នុង ព្រះសហគមន៍គ្រីស្ទាន ហើយទ្រង់បានដកខ្លួនចេញពីសាលាប្រជុំរបស់ជនជាតិយូដាហើយ។»
ដោយខឹងខ្លាំងនឹងចម្លើយដ៏ក្លាហាននេះ ប្រពន្ធជនជាតិយូដាបានវាយដំ សត្តីម៉ាត្រូណា ចាប់ដាក់នាងក្នុងបន្ទប់ងងឹត ហើយចងដៃនាង។ ថ្ងៃបន្ទាប់ នៅពេលសត្តីម៉ាត្រូណា កំពុងលុតជង្គង់អធិស្ឋាន និងសរសើរតម្កើងព្រះ ខ្សែចងនោះបានរបូតចេញពីដៃនាង ដោយសារព្រះចេស្តារព្រះអង្គម្ចាស់។ នាងត្រូវបានចាប់ដាក់ក្នុងបន្ទប់ងងឹត ពីរដងទៀត។ នៅទីបញ្ចប់ សត្តីម៉ាត្រូណា បានស្លាប់ដោយសារអត់ឃ្លាន។
ប្រពន្ធជនជាតិយូដា ដ៏ឃោរឃៅបានយករាងកាយរបស់សត្តីដ៏បរិសុទ្ធនេះ បោះចោលពីលើដំបូលផ្ទះ។ ពួកគ្រីស្ទានបានយករាងកាយរបស់មរណសាក្សីនេះ ទៅបញ្ចុះដោយកិត្តិយស។ ប៊ីស្សព អាឡិចសាន់ដឺ (Alexander) បានដឹងអំពី ការអស្ចារ្យជាច្រើនរបស់សត្តីមរណសាក្សីដ៏វិសុទ្ធនេះ ហើយបានសង់ព្រះសហគមន៍ មួយនៅលើផ្នូរ របស់នាង។
ចំណែកប្រពន្ធជនជាតិយូដាដ៏អាក្រក់នោះ បានទទួលការដាក់ទណ្ឌកម្មដ៏សាក់សម៖ ដោយនៅពេលដែលនាងឈរនៅកន្លែងដដែលដែលនាងបានបោះរាងកាយសត្តីម៉ាត្រូណា នាងបានរអិល ធ្លាក់ពីលើ ហើយស្លាប់នៅកន្លែងនោះទៅ។
ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ) 