ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

ពួកគាត់ទាំងអស់បានទទួលការឈឺចាប់ដើម្បីព្រះគ្រីស្ទ ហើយបានទទួលមកុដនៃសិរីរុងរឿង ក្នុងរាជ្យរបស់អធិរាជដេគីអ៊ូស (Decius)។ តាមបញ្ជារបស់ព្រះអធិរាជ មេបញ្ជាការ តំបន់អាហ្វ្រិក បានប្រកាសដល់ប្រជាជនថាមនុស្សគ្រប់គ្នាត្រូវតែបូជាយញ្ញដល់ព្រះក្លែងក្លាយ។ អ្នកណាដែលប្រឆាំង មេបញ្ជាការបានគំរាមថានឹងធ្វើ ទារុណកម្មយ៉ាងឃោរ ឃៅ។ កាលបើឮការគំរាមនេះ មនុស្សជាច្រើនបានចាកចោលជំនឿ ហើយក្រាបថ្វាយព្រះក្លែងក្លាយ។ ទោះយ៉ាងណា អ្នកទាំង៤០នាក់ នេះនៅតែមានជំនឿមាំមួន ហើយត្រូវបានគេធ្វើទារុណកម្ម។

សត្ត តេរ៉ង់ស៊ី បានលើកទឹកចិត្តបងប្អូនរួមទុក្ខរបស់គាត់ដោយមានប្រសាសន៍ថា៖

“បងប្អូនអើយ ចូរយើងប្រុងប្រយ័ត្នកុំឲ្យបដិសេធព្រះគ្រីស្ទ ជាព្រះជាម្ចាស់របស់យើង
បើមិនដូច្នោះ ទ្រង់នឹងបដិសេធយើងនៅចំពោះព្រះបិតាស្ថានសួគ៌ និងពួកទេវទូតដ៏វិសុទ្ធ។”

មេបញ្ជាការបានបែងចែកពួកគេជាពីរក្រុម។ ក្រុមដំបូងមាន៣៦នាក់ ត្រូវបានវាយដំ ហើយគេកោសស្បែករបស់ពួកគេ ចាក់អំបិលទៅលើរបួស បន្ទាប់មកគេកាត់ក្បាលពួកគេទាំងអស់។ ចំណែកក្រុមទីពីរមាន៤នាក់ ត្រូវបានគេចាប់ដាក់គុក ដោយពាក់ច្រវាក់ដែកធ្ងន់នៅកដៃ កជើង និងក។ ពេលនោះ ទេវទូតរបស់ព្រះជាម្ចាស់បានបង្ហាញខ្លួននៅក្នុងគុក ហើយប៉ះច្រវាក់របស់ពួកគេ ច្រវាក់នោះក៏ធ្លាក់ចេញ។ បន្ទាប់ មក ទេវទូតបានរៀបចំតុអាហារដ៏សម្បូណ៌បែប ផ្ដល់ដល់ពួកគេ។

ពួកគេត្រូវបានយកមកដាក់ទារុណកម្ម ម្តងទៀត ហើយបន្ទាប់មកត្រូវបានយកដាក់គុកឡើងវិញ។មេបញ្ជាការបានបញ្ជាឱ្យ គ្រូទាយសាសនា ក្លែងក្លាយប្រមូល​សត្វ​មាន​ពិស និង​គួរ​ឲ្យ​ស្អប់​ខ្ពើម​ ដូចជាពស់ និងខ្យាដំរី ឱ្យបានច្រើនតាមដែលអាចធ្វើបាន ហើយចាក់ពួកវាចូលក្នុងគុកជាមួយពួកមរណសាក្សី។ សត្វគួរ​ឲ្យ​ស្អប់​ខ្ពើមទាំងនោះ មិនបានខាំពួកអ្នកដែលព្រះជាម្ចាស់ស្រឡាញ់នោះទេ គឺពួកវានៅជំុគ្នា នៅជ្រុងជញ្ជាំងមួយអស់រយៈពេលបីថ្ងៃ។ នៅថ្ងៃទីបី ពេលដែលទ្វារគុកបើក សត្វគួរ​ឲ្យ​ខ្ពើមទាំងនោះ បានរត់ចេញមក ហើយខាំអ្នកទាយទាំងនោះវិញ។

ចុងក្រោយ មេបញ្ជាការបានផ្តន្ទា​ទោស​ប្រហារជីវិត ដល់មរណសាក្សីទាំង៤នាក់។ ពេលគេនាំពួកគាត់មកកាត់ក្បាល ពួកគាត់បានច្រៀងទំនុកដំកើងដោយអំណរ ហើយសរសើរតម្កើងព្រះជាម្ចាស់ ដែលបានប្រទានកិច្ចស្លាប់ដ៏បរិសុទ្ធដល់ពួកគេ។ ពួកគេបានទទួលមរណភាពដ៏ថ្លៃថ្នូរក្នុងឆ្នាំ២៥០ នៃគ.ស. ហើយបានទទួលព្រះរាជ្យស្ថានសួគ៌។