ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

សត្តដ៏រុងរឿងនិងមានជ័យនេះ កើតនៅក្នុងតំបន់កាប់ប៉ាដូស៊ី (Cappadocia) ជាកូនរបស់ឪពុកម្តាយមានទ្រព្យនិងសុចរិត។ ឪពុករបស់គាត់បានទទួលរងទុក្ខដើម្បីព្រះគ្រីស្ត ហើយម្តាយរបស់គាត់បានផ្លាស់ទីលំនៅទៅនៅប៉ាឡេស្ទីន (Palestine)។ ពេលលោក ហ្គេអរហ្គី (George) ធំឡើង គាត់បានចូលបម្រើក្នុងកងទ័ព ហើយនៅអាយុ២០ឆ្នាំ គាត់បានទទួលឋានៈជា​ មេទ័ពទ្រិព៊ូន (tribune) ហើយបានបម្រើអធិរាជឌីអូក្លេស្យ៉ង់ (Diocletian)។ ពេលអធិរាជចាប់ផ្តើមបៀតបៀនគ្រីសាសនិកដោយយ៉ាងឃោរឃៅ ហ្គេអរហ្គីបានឈរនៅមុខអធិរាជ ហើយប្រកាសដោយសេចក្តីក្លាហានថាគាត់ជាគ្រីស្តសាសនិក។ អធិរាជបានចាប់គាត់ដាក់គុក ហើយដាក់ជើងគាត់ក្នុងខ្នោះឈើ ហើយដាក់ថ្មធំលើដើមទ្រូងគាត់។ បន្ទាប់មក អធិរាជបានបញ្ជាអោយចាប់ចង​ លោក ហ្គេអរហ្គី ទៅនឹងរង្វង់កង់មួយ ដែលមានដែកគោលធំៗពីក្រោម ហើយបង្វិលគាត់រហូតដល់រាងកាយគាត់មានរបួសឈាមពេញខ្លួន។ បន្ទាប់មក ពួកគេបានជីករណ្តៅដាក់គាត់ ដោយទុកតែក្បាលគាត់នៅលើដី ហើយទុកគាត់នៅទីនោះអស់៣ថ្ងៃ៣យប់។ បន្ទាប់មក គេបានអោយហ្គេអរហ្គីផឹកថ្នាំពុលដែលអាចសំលាប់មនុស្សបាន ដែលបង្កើតដោយអ្នកវិជ្ជាមន្តអាគមម្នាក់។ ប៉ុន្តែក្នុងពេលទទួលទុក្ខទាំងអស់នេះ ហ្គេអរហ្គីបានអធិស្ឋានដល់ព្រះជានិច្ច ហើយព្រះបានប្រោសគាត់ភ្លាមៗ និងជួយសង្គ្រោះគាត់ពីសេចក្តីស្លាប់ ធ្វើអោយគេគ្រប់គ្នាភ្ញាក់ផ្អើលយ៉ាងខ្លាំង។

ពេលគាត់បានធ្វើអោយមនុស្សស្លាប់រស់ឡើងវិញតាមរយៈការអធិស្ឋាន មនុស្សជាច្រើនបានទទួលយកជំនឿគ្រីស្ទាន។ ក្នុងចំណោមអ្នកទាំងនោះមាន នាងអាឡិចសាន់ដ្រា (Alexandra) ដែលជាប្រពន្ធអធិរាជឌីអូក្លេស្យ៉ង់ មេដឹកនាំបូជាចារនៃសាសនាព្រះក្លែងក្លាយ កសិករគ្លីសេរីអូស (Glycerius) វ៉ាឡេរីអូស (Valerius) ដូណាតុស (Donatus) និងថេរីនុស (Therinus)។ ចុងក្រោយ អធិរាជបានបញ្ជាអោយគេកាត់ក្បាលហ្គេអរហ្គីនិងមហេសីរបស់ខ្លួនគឺអាឡិចសាន់ដ្រា។ អាឡិចសាន់ដ្រាដ៏មានពរបានស្លាប់នៅលើរន្ទា​​ មុនពេលគេកាត់ក្បាល ហើយសត្តហ្គេអរហ្គីត្រូវបានគេកាត់ក្បាលនៅឆ្នាំ៣០៣ គ.ស។

អព្ភូតហេតុជាច្រើនបានកើតឡើងនៅលើផ្នូររបស់សត្តហ្គេអរហ្គី។ លោកបានបង្ហាញខ្លួន ទាំងក្នុងសុបិននិងច្បាស់ជាក់ស្តែង ដល់អ្នកដែលបានអធិស្ឋានហៅគាត់ តាំងពីពេលនោះរហូតមកដល់សព្វថ្ងៃ។ ដោយសារសេចក្តីស្រឡាញ់ចំពោះព្រះគ្រីស្តជាព្រះអម្ចាស់ វាមិនពិបាកទេសំរាប់សត្តហ្គេអរហ្គី ក្នុងការលះបង់អ្វីៗទាំងអស់​ ដូចជា ឋានៈ ទ្រព្យសម្បត្តិ កិត្តិយសក្នុងអាណាចក្រ មិត្តភក្តិ និងលោកិយទាំងមូល។ ដោយសារសេចក្តីស្រឡាញ់នេះ ព្រះអម្ចាស់បានប្រទានអោយគាត់នូវសិរីល្អដ៏អស់កល្ប ទាំងនៅស្ថានសួគ៌និងលើផែនដី ព្រមទាំងជីវិតអស់កល្បក្នុងរាជ្យរបស់ព្រះអង្គ។ លើសពីនេះ ព្រះអម្ចាស់បានប្រទានអំណាចនិងសិទ្ធិដល់គាត់ក្នុងការជួយអ្នកដែលកំពុងរងទុក្ខនិងការលំបាក ដែលគោរពគាត់និងហៅឈ្មោះគាត់។