ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

លោក លីស៊ីនុស (Licinius) ជាប្អូនថ្លៃរបស់អធិរាជកុស្តង់ទីន (Constantine) តាមរយះការ រៀបការជាមួយប្អូនស្រីរបស់ទ្រង់ បានធ្វើធ្វើពុតជាគ្រិស្ទាន នៅមុខអធិរាជដ៏ខ្លាំងពូកែនេះ។ នៅពេលដែលគាត់ ទទួលបានអំណាចពីអធិរាជ អោយគ្រប់គ្រងតំបន់ខាងកើតទាំងមូល គាត់បានចាប់ផ្តើមបៀតបៀនគ្រីស្ទាន ដោយសំងាត់ជាដំបូង ហើយបន្ទាប់មកចេញជាសាធារណៈ ព្រមទាំងពង្រឹងសាសនាព្រះក្លែងក្លាយ។ ប្រពន្ធរបស់គាត់ព្រួយបារម្ភយ៉ាងខ្លាំង ប៉ុន្តែមិនអាចហាមឃាត់ស្វាមីពីការអាក្រក់នេះបានឡើយ។ លីស៊ីនុសបានប្រគល់ខ្លួនទៅសាសនាព្រះក្លែងក្លាយ និងតណ្ហាទាំងអស់ដោយមិនដែលឃាត់ឃាំងអារម្មណ៍ខ្លួនឯងឡើយ បុន្តែអ្វីដែលអាក្រក់ជាងគេនោះគឺ ការប្រព្រឹត្តអំពើឃោរឃៅលើស្ត្រី។

ក្រោមឥទ្ធិពលនៃតណ្ហាដ៏មិនស្អាតស្អំទាំងនេះ លីស៊ីនុសបានព្យាយាមរំលោភបំពាន នាងព្រហ្ម​ចារិយ ឈ្មោះហ្គ្លាភីរ៉ា (Glaphyra) ដែលជាអ្នកបំរើព្រះអគ្គមហេសី។ ហ្គ្លាភីរ៉ាបានថ្លែងបរិយាយពី ហេតុការនេះ ដល់អគ្គមហេសី ហើយព្រះនាងបានជួយឲ្យនាងភៀសខ្លួនពីរាជវាំងនីកូមេឌី (Nicomedia)​ដោយសម្ងាត់ ទៅខេត្តពុនទុស (Pontus)។ ហ្គ្លាភីរ៉ាបានមកដល់ទីក្រុងអាម៉ាស៊ី (Amasea) ហើយត្រូវបានស្វាគមន៍ដោយប៊ីស្សបបាស៊ីល និងគ្រីស្ទានដទៃទៀត។ នាងរីករាយយ៉ាងខ្លាំងដែលព្រះបានជួយរក្សាភាពបរិសុទ្ធរបស់នាង ហើយបានសរសេរសំបុត្រមកព្រះអគ្គមហេសីដើម្បីរាយការណ៍។ ព្រះអគ្គ ហេសីក៏រីករាយដែរ ហើយបានផ្ញើថវិកាទៅព្រះសហគមន៍ នៅអាម៉ាស៊ី។ ទោះយ៉ាងណា សំបុត្រមួយរបស់ហ្គ្លាភីរ៉ាដែលចង់ផ្ញើទៅដល់អគ្គមហេសី បុន្តែបានធ្លាក់ក្នុងដៃអ្នកបំរើអធិរាជ (អាម៉ាត) ហើយគេក៍យកសំបុត្រនោះទៅបង្ហាញដល់លីស៊ីនុស។

អធិរាជបានដឹងថាហ្គ្លាភីរ៉ាស្ថិតនៅទីណា ក៏បានបញ្ជាភ្លាមៗឲ្យនាំនាង និងសម្តេចប៊ីស្សបមកនីកូមេឌីវិញ។ ក្នុងពេលនោះ ហ្គ្លាភីរ៉ាបានទទួលមរណភាព ហើយទាហានបាននាំតែសម្តេចប៊ីស្សបបាស៊ីលម្នាក់ឯង ដោយចងខ្សែគាត់មកនីកូមេឌី។ បន្ទាប់ពីការធ្វើទារុណកម្ម និងការឃុំឃាំង បុគ្គលដ៏មានពរនេះត្រូវបានគេកាត់ក្បាល ហើយបោះចោលសពគាត់ទៅក្នុងសមុទ្រ ក្នុងឆ្នាំ៣២២ គ.ស។ តាមរយៈចក្ខុវិញ្ញាណនៃទេវទូតរបស់ព្រះអម្ចាស់ បុព្វជិតក្នុងព្រះវិហាររបស់សត្តបាសីល​ បានរកឃើញរាងកាយរបស់គាត់នៅជិតទីក្រុងស៊ីនូប (Sinope)។

ពួកគេបានស្រងរាងកាយគាត់ពីទឹកដោយប្រើសំណាញ់របស់អ្នកនេសាទ ហើយបាននាំរាងកាយគាត់ត្រឡប់មកអាម៉ាស៊ីវិញ ដែលពួកគេបានបញ្ចុះដោយកិត្តិយសនៅក្នុងព្រះវិហារដែលគាត់បានខិតខំសាងសង់។ អធិរាជកុងស្តង់ទីន បានលើកកងទ័ពទៅប្រឆាំងនឹងលីស៊ីនុស បានឈ្នះ​ ហើយបានចាប់ខ្លួនលីសុីនុស ហើយនិរទេសគេទៅកាន់ប្រទេសហ្គាល (Gaul) ដែលជាកន្លែង​ លីសុីនុសបានបញ្ចប់ជីវិតពេញដោយសេចក្តីស្អប់ព្រះ។