ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

យ៉ាកុបជាកូនប្រុសរបស់លោក សេបេឌី (Zebedee) បងប្អូនរបស់លោកយ៉ូហាន និងជាសាវ័កម្នាក់ក្នុងចំណោមសាវ័កទាំង១២រូប។ ពេលព្រះអម្ចាស់យេស៊ូ បានហៅគាត់ យ៉ាកុបបានចាកចោលសំណាញ់នេសាទ និងឪពុករបស់គាត់ ហើយ ដើរតាមព្រះអម្ចាស់ភ្លាមៗជាមួយយ៉ូហាន។ គាត់ជាសាវ័កម្នាក់ក្នុងចំណោមសាវ័កបីរូប ដែលព្រះអម្ចាស់បានបង្ហាញអច្ឆរិយការ ដ៏ជ្រាលជ្រៅទៅដល់ពួកគាត់ គឺទ្រង់បានប្រែរូប(transfiguration) នៅមុខពួកគាត់ នៅលើភ្នំតាប័រ (Tabor) ហើយទ្រង់បានសោកសង្រេង​ នៅមុខពួកគាត់ នៅសួន កេតសេ‌ម៉ានី (Gethsemane) មុនពេលទ្រង់ទទួលរងទុក្ខ។

ក្រោយពីទទួលព្រះវិញ្ញាណដ៏រិសុទ្ធ យ៉ាកុបបានផ្សព្វផ្សាយដំណឹងល្អនៅតាមទីកន្លែងផ្សេងៗ និងបានធ្វើដំណើរទៅប្រទេសអេស្ប៉ាញ។ ពេលត្រឡប់មកពីអេស្ប៉ាញ ពួកយូដាបានចាប់ផ្តើមជជែកវែកញែកជាមួយគាត់អំពីព្រះគម្ពីរដ៏វិសុទ្ធ ប៉ុន្តែគ្មាននរណាម្នាក់អាចឈ្នះគាត់បានឡើយ សូម្បីតែអ្នកមានវេទមន្តម្នាក់ឈ្មោះហឺម៉ូហ្គែន (Hermogenes) ក៏ដោយ។ ហឺម៉ូហ្គែន និងសិស្សរបស់គាត់ឈ្មោះហ្វីលីព (Philip) ត្រូវបានផ្ចាញ់ដោយអំណាចនៃសេចក្តីពិតដែលយ៉ាកុបបានប្រកាស ហើយអ្នកទាំងពីរបានទទួលពិធីជ្រមុជទឹក។

ក្រោយមក ពួកយូដាបានចោទប្រកាន់យ៉ាកុបនៅចំពោះព្រះបាទហេរ៉ូដ (Herod) ហើយបានលួងលោមអោយមនុស្សម្នាក់ឈ្មោះយ៉ូស៊ីអាស (Josias) មកបង្កាច់សាវ័ក។ យ៉ូស៊ីអាស កាលបានឃើញឥរិយាបថដ៏ក្លាហានរបស់យ៉ាកុប និងបានស្តាប់ការពន្យល់ដ៏ច្បាស់លាស់អំពីសេចក្តីពិត ក៏បានកែប្រែចិត្តគំនិត ហើយជឿលើព្រះគ្រីស្ត។ នៅពេលយ៉ាកុបត្រូវបានគេកាត់ទោសឲ្យស្លាប់ យ៉ូស៊ីអាសក៏ត្រូវបានគេកាត់ទោសឲ្យស្លាប់ដែរ។ នៅតាមផ្លូវទៅកាន់កន្លែងដាក់ទណ្ឌកម្ម យ៉ូស៊ីអាសបានអង្វរយ៉ាកុបអោយអត់ឱនទោសចំពោះកំហុសរបស់គាត់ក្នុងការមួលបង្កាច់។ យ៉ាកុបបានឱប និងថើបយ៉ូស៊ីអាស ហើយមានប្រសាសន៍ថា៖ «សន្តិភាព និងការអត់ឱន ទោសចូរមានដល់អ្នក!»។ អ្នកទាំងពីរបានក្រាបក្បាលចុះក្រោមដាវ ហើយត្រូវបានគេកាត់ក្បាលដើម្បីព្រះអម្ចាស់ដែលពួកគេស្រឡាញ់ និងបានបំរើ។
សត្តយ៉ាកុបបានទទួលមរណភាពនៅក្រុងយេរូសាឡិមក្នុងឆ្នាំ៤៥​ គ.ស.។ រាងកាយរបស់គាត់ត្រូវបានយកទៅប្រទេសអេស្ប៉ាញ ដែលរហូតមកដល់សព្វថ្ងៃនេះ
មានអព្ភូតហេតុនៃការព្យាបាល កើតឡើងនៅក្បែរផ្នូររបស់គាត់។