ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

សត្តគីរីល និងមេតូឌ្យុស គឺជាបងប្អូនដែលកើតនៅក្រុងសាឡូនិក (Thessalonica) ក្នុងគ្រួសារមានឋានៈខ្ពង់ខ្ពស់ និងមានទ្រព្យសម្បត្តិ ជាបុត្ររបស់លោកលីអូ (Leo) និងម៉ារីយ៉ា
(Maria)។ មេតូឌ្យុស ជាបងប្រុស បានចំណាយពេល១០ឆ្នាំជាមេបញ្ជាការនៅចំណោមជនជាតិស្លាវ នៅប្រទេសម៉ាសេដូនី (Macedonian Slavs) ហើយបានរៀនភាសាស្លាវ។ បន្ទាប់មក លោកបានដកខ្លួនទៅភ្នំអូឡាំពុស (Olympus) ដើម្បីបំពេញជីវិតជាអ្នកបួស។ នៅទីនេះហើយ ដែលគីរីល (ដែលមានឈ្មោះដើមថា កុងស្តង់ទីន / Constantine) បាន មកចូលរួមនៅជាមួយលោក។

នៅពេលដែលស្តេចខាហ្សារ (Khazars) ព្រះនាមកាហ្កាន (Kagan) បានស្នើសុំគ្រូបង្រៀនសាសនាគ្រិស្ត ពីព្រះចៅអធិរាជមីខាអែលទី៣ (Emperor Michael III) បងប្អូនទាំងពីរនេះត្រូវបានជ្រើសរើស ហើយចាត់ចែងឱ្យទៅកាន់តំបន់អាណាចក្រខាហ្សារ។

ពួកគេបានបំប្លែងស្តេចកាហ្កានឱ្យទទួលជំនឿព្រះគ្រិស្ត ហើយបានធ្វើពិធីជ្រមុជទឹកដល់ព្រះអង្គ ព្រមទាំងមន្ត្រីជាន់ខ្ពស់ជាច្រើន និងប្រជាជនជាច្រើនទៀត។ បន្ទាប់ពីមួយរយៈពេល ពួកគេបានត្រឡប់មកក្រុងកុងស្តង់ទីនូប៉ុល (Constantinople) ហើយបានបង្កើតតួអក្សរស្លាវ៉ូនិក (Slavonic) ដែលមាន៣៨តួ។ ពួកគេក៏បានបកប្រែសៀវភៅសាសនាពីភាសាក្រិកទៅជាភាសាស្លាវ៉ូនិក។
ដោយសារការស្នើសុំពីព្រះអង្គម្ចាស់ រាស្តិស្លាវ (Prince Rastislav) ពួកគេបានធ្វើដំណើរទៅម៉ូរាវី (Moravia) ដើម្បីផ្សព្វផ្សាយ និងពង្រឹងជំនឿដ៏វិសុទ្ធ​ ព្រមទាំងចម្លងសៀវភៅជាច្រើនដើម្បីចែកជូនពួកបូជាចារ្យសម្រាប់បង្រៀនយុវជន។

នៅពេលដែលសម្ដេចប៉ាប (Pope) ស្នើសុំអោយ លោកគីរីលធ្វើដំណើរទៅក្រុងរ៉ូម (Rome)​ លោកក៏ទៅ។ នៅទីនោះ លោកបានឈឺ ហើយបានទទួលមរណភាពនៅថ្ងៃទី១៤ ខែកុម្ភៈ ឆ្នាំ៨៦៧។ ចំណែកមេតូឌ្យុសបានត្រឡប់ទៅម៉ូរាវីវិញ ហើយបានបន្តការងារពង្រឹងជំនឿលើព្រះគ្រិស្តនៅចំណោមប្រជាជនស្លាវរហូតដល់ពេលលោកទទួល មរណភាព (លោកបានសោយទិវង្គតនៅថ្ងៃទី៦ ខែមេសា ឆ្នាំ៨៨៥)។ បន្ទាប់ពីលោកសោយទិវង្គត សិស្សានុសិស្សរបស់លោក ដែលគេហៅថា អ្នកដើរតាមលោកទាំង៥នាក់ ជាមួយ សត្តគ្លីម៉ង់ (Clement) ដែលជាប៊ីស្សបរបស់ពួកគេ បានឆ្លងទន្លេដានូប (Danube) ហើយធ្វើដំណើរទៅភាគខាងត្បូងទៅកាន់ប្រទេស ម៉ាសេដូនី (Macedonia)។ ពួកគេបានបន្តកិច្ចការដែលលោកគីរីល និងមេតូឌ្យុសដែលបានចាប់ផ្ដើមនៅភាគខាងជើង ដោយចាប់ផ្តើមធ្វើការពីក្រុងអូរីដ (Ohrid)។