ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

មុនពេលអគ្គទេវទូតហ្គាប្រីអែល (Gabriel) បង្ហាញខ្លួនដល់ ម៉ារីព្រហ្មចារី (Mary) ដ៏វិសុទ្ធនៅភូមិណាហ្សារ៉ែត (Nazareth) ប្រាំមួយខែមុននោះ អគ្គទេវទូតដ៏អស្ចារ្យរបស់ព្រះជាម្ចាស់នេះ បានបង្ហាញខ្លួនដល់លោកសាការី (Zacharias) បូជាចារ្យជាន់ខ្ពស់ នៅព្រះវិហារក្រុងយេរូសាឡឹម (Jerusalem)។ មុននឹងប្រកាសអំពីការផ្ដល់កំណើតដ៏អស្ចារ្យដោយម៉ារី ដែលនៅជាស្ត្រីព្រហ្មចារីមិនទាន់រៀបការ អគ្គទេវទូតនេះបានប្រកាសអំពីការផ្ដល់កំណើតដ៏អស្ចារ្យរបស់អ្នកស្រីអេលី‌សា‌បិត (Elizabeth) ដែលគ្មានកូន ហើយមានវ័យចំណាស់។ លោកសាការី មិនបានជឿភ្លាមៗលើពាក្យរបស់អ្នកនាំសារព្រះនោះទេ ហេតុនេះហើយបានជាអណ្ដាតរបស់គាត់រឹង មិនអាចនិយាយបានរហូតដល់៨ថ្ងៃក្រោយពេលសត្តយ៉ូហានកើត។ នៅថ្ងៃនោះ សាច់ញាតិរបស់សាការី និងអេលីសាបិតបានប្រមូលគ្នាដើម្បីធ្វើពិធីកាត់ស្បែក និងដាក់ឈ្មោះដល់កូន។ ពេលពួកគេសួរឪពុកថាតើចង់ដាក់ឈ្មោះកូនយ៉ាងណា ដោយសារគាត់មិនអាចនិយាយបាន លោកបានសរសេរនៅលើក្ដារថា៖ «យ៉ូហាន»។ ពេលនោះអណ្ដាតរបស់គាត់បានធូរ ហើយគាត់ចាប់ផ្ដើមនិយាយបាន។ផ្ទះរបស់សាការី ស្ថិតនៅលើខ្ពង់រាបរវាងបេត្លេហិម (Bethlehem) និងហេប្រុន (Hebron)។ ដំណឹងអំពីអង្គទេវទូតរបស់ព្រះជាម្ចាស់បានបង្ហាញខ្លួនចំពោះហ្សាខារីយ៉ាស ព្រមទាំងការរឹងអណ្ដាត និងការធូរអណ្ដាតរបស់គាត់នៅពេលសរសេរឈ្មោះ «យ៉ូហាន» បានរីករាលដាលពាសពេញអ៊ីស្រាអែល។ ដំណឹងនេះសូម្បីតែព្រះអង្គម្ចាស់ហេរ៉ូដ (Herod) ក៏បានដឹងដែរ។ ហេតុដូច្នេះ ពេលហេរ៉ូដបញ្ជអោយទាហានទៅសម្លាប់កុមារនៅបេថ្លេហិម គេក៏បានបញ្ជអោយមនុស្សទៅទួលខ្ពង់រាបនោះ ទៅកាន់លំនៅគ្រួសារសាការី ដើម្បីសម្លាប់យ៉ូហានផងដែរ។ ប៉ុន្តែនាងអេលីសាបិតបានលាក់កូនយ៉ាងលឿន។ ដោយខឹងនឹងហេតុការណ៍នេះ ព្រះមហាក្សត្រហេរ៉ូដបានបញ្ជាអោយអ្នកប្រហារជីវិតរបស់គាត់ទៅរកសាការី នៅព្រះវិហារ ដើម្បីសម្លាប់គាត់ (ព្រោះកាលនោះ ជាវេនរបស់សាការី ម្ដងទៀតក្នុងការបំរើនៅព្រះវិហារយេរូសាឡឹម)។ សាការី ត្រូវបានសម្លាប់នៅចន្លោះវិមាន និងព្រះវិហារ ហើយឈាមរបស់គាត់កក និងក្លាយជាថ្មនៅលើក្ដារឥដ្ឋ ហើយស្ថិតនៅជាសាក្សីអស់កល្បជានិច្ចប្រឆាំងនឹងហេរ៉ូដ។ អេលីសាបិតបានលាក់ខ្លួនជាមួយកូននៅក្នុងគុហាមួយ ហើយនាងបានស្លាប់មិនយូរប៉ុន្មានក្រោយមក។ កុមារយ៉ូហាននៅតែម្នាក់ឯងក្នុងទីរហោឋាន ក្រោមការថែរក្សារបស់ព្រះជាម្ចាស់ និងអគ្គទេវទូតរបស់ព្រះអង្គ។