ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

ក្នុងរាជ្យព្រះចៅអធិរាជលេអូដ៏មហារាជ (ឆ្នាំ ៤៥៧-៤៧៤) និងព្រះអគ្គមហេសីវេរីណា ព្រមទាំងសម្ដេចប៉ាទ្រីអាក្ខហ្គេណាឌីអ៊ូស (Gennadius) មានអភិជនពីរនាក់មកពីក្រុងកុងស្តង់ទីនូប៉ូល ឈ្មោះហ្គាលីប៊ូស (Galibus) និងខាន់ឌីឌូស (Candidus) បានធ្វើដំណើរទៅកាន់ទឹកដីដ៏វិសុទ្ធ (Holy Land) ដើម្បីគោរពកន្លែងដ៏វិសុទ្ធ។ ពួកគេបានឈប់សំរាកនៅណាហ្សារ៉ែត (Nazareth) ក្នុងផ្ទះរបស់ស្ត្រីជនជាតិយូដាម្នាក់ ដែលបានរក្សារ៉ូបរបស់ព្រះមាតាដ៏វិសុទ្ធនៃព្រះជាម្ចាស់នៅក្នុងបន្ទប់សំងាត់មួយ។ មនុស្សជាច្រើនដែលឈឺថ្កាត់ និងត្រូវការជាសះស្បើយ បានទទួលការព្យាបាលតាមរយៈការអធិស្ឋាន និងការប៉ះពាល់នឹងរ៉ូបនោះ។

ហ្គាលីប៊ូស និងខាន់ឌីឌូស បាននាំវត្ថុដ៏វិសុទ្ធនេះមកកុងស្តង់ទីនូប៉ូល ហើយរាយការណ៍ដល់ព្រះចៅអធិរាជ និងសម្ដេចប៉ាទ្រីអាក្ខ។ ហេតុការណ៍នេះបានធ្វើឱ្យមានអំណរយ៉ាងខ្លាំងក្នុងទីក្រុងរាជធានីនេះ។ រ៉ូបនោះត្រូវបានដាក់តាំងយ៉ាងឱឡារិកនៅក្នុងព្រះវិហារប្លាគែរ៍នេ (ដែលត្រូវបានសាងសង់ឡើងដោយព្រះចៅអធិរាជម៉ារស៊ីអាន់ [Marcian] និងអគ្គមហេសីពុលកេរីអា [Pulcheria] នៅលើច្រាំងសមុទ្រមួយ ហើយត្រូវបានដាក់ឈ្មោះតាមឈ្មោះរបស់ប្លាកើរ៉ាន់ [Blacheran] ដែលជាមេបញ្ជាការម្នាក់ពីស្រុកស្គីទីស [Scetis] ដែលត្រូវបានគេសម្លាប់នៅទីនោះ)។

ពិធីបុណ្យនេះត្រូវបានប្រារព្ធឡើង ដើម្បីរំលឹកដល់ការដាក់រ៉ូបរបស់ព្រះមាតាដ៏វិសុទ្ធនៃព្រះជាម្ចាស់នៅក្នុងព្រះវិហារប្លាគែរ៍នេ។