សត្តស៊ីសូអេស (VENERABLE SISOES) ដ៏អស្ចារ្យ (THE GREAT)
VENERABLE SISOES THE GREAT
សត្តស៊ីសូអេស (Sisoes) ជាជនជាតិអេហ្ស៊ីប ហើយជាសិស្សរបស់សត្តអង់តូនី (Anthony) ដ៏អស្ចារ្យ។ ក្រោយពីសត្តអង់តូនីទទួលមរណភាព សត្តស៊ីសូអេសបានទៅគង់នៅលើភ្នំវាលរហោស្ថានមួយឈ្មោះថា ភ្នំសត្តអង់តូនី (St. Anthony’s Mount) ដែលសត្តអង់តូនីធ្លាប់រស់នៅក្នុងជិវិតជាអ្នកបួសនៅទៅនោះ។ ដោយដាក់ខ្លួនឱ្យទទួលការលំបាកជាច្រើន លោកបានធ្វើឱ្យខ្លួនឯងស្ងប់ស្ងៀម និងស្លូតបូតដូចកូនចៀម។ ហេតុនេះ ព្រះជាម្ចាស់បានប្រទានព្រះគុណដ៏ច្រើនដល់ស៊ីសូអេស ដែលធ្វើឱ្យលោកអាចព្យាបាលអ្នកឈឺ បណ្ដេញវិញ្ញាណអារក្ស និងធ្វើឲ្យមនុស្សរស់ឡើងវិញពីស្លាប់។
ស៊ីសូអេសបានរស់នៅជាអ្នកបួសក្នុងវាលរហោស្ថានអស់រយៈពេល ៦០ ឆ្នាំ ហើយបានក្លាយជាប្រភពនៃប្រាជ្ញារស់ សម្រាប់សង្ឃផ្សេងៗ និងជនសាមញ្ញដែលមកសុំដំបូន្មានពីលោក។ មុនពេលទទួលមរណភាព មុខរបស់លោកភ្លឺដូចព្រះអាទិត្យ។ ពួកសង្ឃដែលឈរព័ទ្ធជុំវិញលោក ក៏ភ្ញាក់ផ្អើលនឹងការឃើញនេះ។ ហើយនៅពេលដែលសត្តនេះបានបញ្ចប់ជីវិត បន្ទប់ទាំងមូលពោរពេញដោយក្លិនក្រអូបដ៏ពិសេស។ ស៊ីសូអេសបានទទួលមរណភាពក្នុងវ័យចាស់ជរាខ្លាំង នៅឆ្នាំ ៤២៩ គ.ស.។
សត្តស៊ីសូអេសបានដាស់តឿនពួកសង្ឃថា៖
«ទោះបីជាការល្បួងកើតឡើងដល់មនុស្សតាមរបៀបណាក៏ដោយ មនុស្សគួរតែប្រគល់ខ្លួនទៅតាមព្រះហឫទ័យរបស់ព្រះ ហើយទទួលស្គាល់ថា ការល្បួងបានមកដោយសារអំពើបាបរបស់ខ្លួន។ បើមានអ្វីល្អកើតឡើង គួរនិយាយថាវាកើតឡើងតាមការប្រោសប្រទានរបស់ព្រះ»
សង្ឃម្នាក់បានសួរសត្តស៊ីសូអេស៖
«តើខ្ញុំអាចធ្វើដូចម្ដេចដើម្បីបំពេញព្រះហឫទ័យរបស់ព្រះជាម្ចាស់ និងត្រូវបានសង្គ្រោះ?»
សត្តនេះបានឆ្លើយ៖
«បើអ្នកចង់អោយព្រះជាម្ចាស់សព្វព្រះហឫទ័យ អ្នកត្រូវចាកចេញពីលោកិយ បំបែកខ្លួនពីផែនដី ឈប់ជាប់ជំពាក់នឹងការបង្កើត ហើយខិតចូលទៅជិតព្រះជាអ្នកបង្កើតវិញ។ រួបរួមជាមួយព្រះអម្ចាស់ដោយការអធិស្ឋាន និងទឹកភ្នែក។ បើធ្វើដូច្នេះ អ្នកនឹងបានសម្រាកទាំងក្នុងលោកិយនេះ និងលោកខាងមុខ។»
សង្ឃម្នាក់ទៀតបានសួរថា៖
«តើខ្ញុំអាចទទួលការដាក់ខ្លួនដោយរបៀបណា?»
សត្តនេះឆ្លើយថា៖
«នៅពេលដែលមនុស្សម្នាក់រៀនទទួលស្គាល់ថាមនុស្សគ្រប់គ្នាល្អជាងខ្លួន នោះគាត់បានរកឃើញការដាក់ខ្លួនហើយ។»
អាម៉ូន (Ammon) បានថ្លែងរអ៊ូរប្រាប់សត្តស៊ីសូអេសថា គាត់មិនអាចទន្ទេញពាក្យពេចន៍ដ៏ឆ្លាតវៃដែលគាត់បានអាន ដើម្បីនិយាយឡើងវិញនៅពេលសន្ទនាជាមួយមនុស្សឡើយ។ សត្តបានឆ្លើយថា៖
«វាមិនចាំបាច់ទេ។ អ្វីដែលចាំបាច់គឺការរក្សាចិត្តបរិសុទ្ធ ហើយនិយាយចេញពីចិត្តបរិសុទ្ធនោះ ដោយដាក់ក្ដីសង្ឃឹមទៅលើព្រះជាម្ចាស់។»
ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ) 