ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

មីកា (Micah) គឺជាបុត្រនៃអំបូរយូដា (Judah) និងមកពីភូមិម៉ូរ៉ាស់ (Morasth) ហេតុនេះហើយបានជាគេហៅគាត់ថា «អ្នកភូមិម៉ូរ៉ាស់» (Morasthite)។ គាត់រស់នៅក្នុងសម័យដូចគ្នានឹងហោរាអេសាយ (Isaiah) អាម៉ុស (Amos) ហូសេ (Hosea) ព្រមទាំងព្រះមហាក្សត្រ យ៉ូថាម (Jotham) អាហាស (Ahaz) និងហ៊ីល‌គីយ៉ា (Hezekiah) ​នៃរាជាណាចក្រយូដា។ មីកាបានរិះគន់ប្រជារាស្ត្រចំពោះអំពើអាក្រក់របស់ពួកគេ ហើយក៏​ រិះគន់ ពួកហោរាក្លែងក្លាយដែលប្រកាសទាយដើម្បីស្រានិងគ្រឿងស្រវឹង (មីកា ២:១១)។ គាត់បានព្យាករអំពីការវិនាសរបស់ជនជាតិសាម៉ារី (Samaria)។ គាត់ក៏បានព្យាករផងដែរអំពីការវិនាសរបស់ក្រុងយេរូសាឡិម (Jerusalem) ដែលនឹងកើតឡើងដោយសារមេដឹកនាំទទួលសំណូក ពួកបូជាចារ្យបង្រៀនដើម្បីបានការប្រាក់ ហើយនិងពួកហោរាទាយជោគជតាដើម្បីលុយកាក់។ ហេតុនេះព្រោះតែអ្នករាល់គ្នាខ្មាំងនឹងភ្ជួររាស់ក្រុងស៊ីយ៉ូនដូចភ្ជួរស្រែហើយក្រុងយេរូ‌សាឡឹមនឹងក្លាយទៅជាគំនរបាក់‌បែករីឯភ្នំដែលមានព្រះ‌វិហារនឹងក្លាយទៅជាព្រៃ។ (មីកា ៣:១២)។ ប៉ុន្តែ ក្នុងចំណោមព្យាករណ៍ទាំងអស់របស់គាត់ ព្យាករណ៍ដ៏សំខាន់បំផុតគឺអំពីបេត្លេហេម (Bethlehem) ជាកន្លែងប្រសូត្ររបស់ព្រះអង្គសង្គ្រេាះ ដែលបានមកពីអតីតកាល និងពីអស់កល្បជានិច្ច (មីកា ៥:២)។

យេីងមិនបានដឹងច្បាស់ថាតើហោរានេះត្រូវបានពួកយូដាសម្លាប់ ឬស្លាប់ដោយសុខសាន្តនេាះឡើយ។ [មីកា អ្នកភូមិម៉ូរ៉ាស់បានព្យាករក្នុងរជ្ជកាលមហាក្សត្រយូដា ហ៊ីស្គីយ៉ាហើយបានមានប្រសាសន៍ទៅកាន់ប្រជារាស្ត្រយូដាទាំងអស់ថា៖ «ព្រះ‌អម្ចាស់នៃពិភពទាំងមូលមានព្រះ‌បន្ទូលថាគេនឹងភ្ជួររាស់ក្រុងស៊ីយ៉ូនដូចភ្ជួរស្រែ ហើយក្រុងយេរូ‌សាឡឹមនឹងក្លាយទៅជាគំនរបាក់បែក ភ្នំដែលមានព្រះ‌វិហារនឹងក្លាយទៅជាព្រៃ។

នៅសម័យនោះ តើព្រះ‌បាទអេសេខ្យាសជាស្តេចស្រុកយូដា និងប្រជាជនយូដាទាំងមូល បានសម្លាប់ព្យាការីមីកាឬទេ? ទេ! ពួកគេបែរជាគោរពកោតខ្លាចព្រះ‌អម្ចាស ហើយនាំគ្នាទូល‌អង្វរព្រះ‌អង្គទៀតផង។ ហេតុនេះហើយបានជាព្រះ‌អង្គមិនដាក់ទោសពួកគេ តាមការសម្រេចរបស់ព្រះ‌អង្គឡើយ។ ប្រសិនបើយើងប្រហារជីវិតលោកនេះ ទុក្ខទោសយ៉ាងធ្ងន់នឹងធ្លាក់មកលើយើង។»] (យេរេមា ២៦:១៨-១៩)។ 

ទោះយ៉ាងណា គេដឹងថាគាត់ត្រូវបានបញ្ចុះនៅភូមិកំណើតរបស់គាត់។

ក្នុងរាជ្យអធិរាជថេអូដូស៊ីអូសដ៏អស្ចារ្យ (Theodosius the Great) សម្ដេចប៊ីស្សបហ្សេវ៉ីន (Zevin) នៃអេលេអូត្រូប៉ូលីស (Eleutheropolis) បានមាននិមិត្តដ៏អច្ឆរិយៈមួយ ដែលនាំអោយរកឃើញសពដ៏បរិសុទ្ធរបស់មីកា រួមជាមួយហោរាហាបាគុក (Habakkuk)។