ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

អនដ្រេ (Andrew) គឺជាមេបញ្ជាការកងទ័ពរ៉ូម (ស្ត្រាតេឡាតេស/Stratelates) ក្នុងរាជ្យអធិរាជម៉ាក់ស៊ីមៀន (Maximian)។ គាត់កើតនៅស៊ីរី (Syria) ហើយបានបម្រើការយោធានៅទីនោះ។ នៅពេលដែលពួកពែរ្ស (Persia) ឈ្លានពានចក្រភពរ៉ូម អនដ្រេត្រូវបានគេទុកចិត្តឲ្យដឹកនាំកងទ័ពរ៉ូមដើម្បីការពារទឹកដី។ ដោយសារតែគាត់ជាគ្រីស្ទានដោយសំងាត់ (ទោះបីមិនទាន់បានទទួលពិធីជ្រមុជទឹកក៏ដោយ) អនដ្រេបានជឿជាក់លើព្រះជាម្ចាស់ដែលមានព្រះជន្មរស់ ហើយបានជ្រើសរើសតែយោធាដ៏ល្អបំផុតសម្រាប់ច្បាំង។ មុនពេលច្បាំង គាត់បានប្រាប់ទាហានរបស់គាត់ថា៖ «បើពួកអ្នកអធិស្ឋានដល់ព្រះគ្រីស្ទជាព្រះអម្ចាស់ សត្រូវរបស់អ្នកនឹងរត់ខ្ចាត់ខ្ចាយដូចធូលី!»។ ពិតមែន ពួកទាហានទាំងអស់បានអធិស្ឋានដល់ព្រះគ្រីស្ទ ហើយវាយផ្ចាញ់កងទ័ពពែរ្សយ៉ាងខ្លាំងខ្លា។នៅពេលអនដ្រេត្រឡប់មកក្រុងអង់ទីយ៉ុក (Antioch) មានអ្នកច្រណែនបានថ្កោលទោសគាត់ថាជាគ្រីស្ទាន។ អ្នកគ្រប់គ្រងខេត្តបានហៅគាត់មកសួរចម្លើយ ហើយអនដ្រេបានផ្ដោតជំនឿរបស់គាត់លើព្រះគ្រីស្ទយ៉ាងមុតមាំ។

បន្ទាប់ពីធ្វើទារុណកម្មគាត់យ៉ាងសាហាវ អ្នកគ្រប់គ្រងខេត្តបានដាក់គាត់ក្នុងគុក ហើយសរសេរសំបុត្រទៅប្រាប់អធិរាជ។ ដោយដឹងថាអនដ្រេមានកិត្តិយសខ្ពស់ក្នុងចំណោមប្រជាជននិងទាហាន អធិរាជបានបញ្ជាអោយដោះលែងគាត់ ហើយរកឳកាសសម្លាប់គាត់នៅពេលក្រោយ។អនដ្រេបានដឹងពីគម្រោងនេះតាមរយៈនិមិត្តដែលបានមកពីព្រះ ហើយបានភៀសខ្លួនទៅក្រុងតាសុស (Tarsus) ជាមួយទាហានដ៏ស្មោះស្ម័គ្រចំនួន ២,៥៩៣ នាក់។ នៅទីនោះ ពួកគេទាំងអស់ត្រូវបានធ្វើពិធីជ្រមុជទឹកដោយសម្ដេចប៊ីស្សបពេត្រុស (Bishop Peter)។ ក៏ប៉ុន្តែ ពួកអាជ្ញាធររ៉ូមបានតាមដាក់ទោសពួកគេ ហើយអនដ្រេនិងក្រុមទាហានរបស់គាត់បានរត់ទៅលាក់ខ្លួននៅភ្នំតូរុស (Mount Taurus) ក្នុងប្រទេសអាមេនី។ កងទ័ពរ៉ូមបានចាប់តាមទាន់ពួកគេនៅពេលពួកគេកំពុងអធិស្ឋាន ហើយបានកាត់ក្បាលពួកគេទាំងអស់។ គ្មានអ្នកណាបានព្យាយាមរត់ឡើយ ពីព្រោះពួកគេចង់បានមរណភាពដើម្បីព្រះគ្រីស្ទ។នៅកន្លែងដែលឈាមរបស់ពួកមរណសាក្សីទាំងនេះបានហូរ បានបណ្ដាលអោយមានអណ្ដូងទឹកដ៏បរិសុទ្ធផុសឡើង ដែលអាចព្យាបាលជំងឺបានយ៉ាងច្រើន។ សម្ដេចប៊ីស្សបពេត្រុសបាននាំអ្នកជំនុំមកបញ្ចុះសពពួកគេយ៉ាងថ្លៃថ្នូរដោយសំងាត់។ ពួកគេទាំងអស់បានទទួលមកុដជ័យនៃសិរីរុងរឿង ហើយបានចូលស្នាក់នៅក្នុងព្រះរាជាណាចក្ររបស់ព្រះគ្រីស្ទជាអម្ចាស់។