សត្ត ថាដេ (Thaddaeus) គ្រីស្ទទូតដ៏វិសុទ្ធ
THE HOLY APOSTLE THADDAEUS
សត្ត ថាដេ (Thaddaeus) នេះគឺជាគ្រីស្ទទូតមួយរូបក្នុងចំណោមគ្រីស្ទទូតទាំង៧០អង្គ ប៉ុន្តែមិនមែនជាគ្រីស្ទទូតថាដេដែលជាគ្រីស្ទទូតក្នុងចំណោម១២អង្គនោះទេ។ សត្ត ថាដេ បានជួបសត្តយ៉ូហានអ្នកធ្វើពិធីជ្រមុជទឹក (John the Baptist) ជាលើកដំបូង ហើយបានទទួលពិធីបុណ្យជ្រមុជទឹកពីលោក។ បន្ទាប់មក លោកបានជួបព្រះយេស៊ូគ្រិស្ត ហើយដើរតាមព្រះអង្គ។ ព្រះអម្ចាស់បានជ្រើសរើសលោកឲ្យគង់ក្នុងចំណោមគ្រីស្ទទូត៧០អង្គដែលតូចជាង ហើយបានចាត់ឲ្យពួកគេចេញទៅពីរៗនាក់៖
«ក្រោយមកព្រះអម្ចាស់ជ្រើសយកគ្រីស្ទទូត*ចិតសិបពីររូបទៀតហើយចាត់គេពីរៗនាក់ឲ្យទៅតាមភូមិតាមស្រុកនានាដែលព្រះអង្គបម្រុងនឹងយាងទៅ។» (លូកា ១០:១)
បន្ទាប់ពីព្រះអង្គរស់ពីស្លាប់ឡើងវិញដ៏រុងរឿង និងយាងឡើងទៅស្ថានសួគ៌ ព្រះអម្ចាស់បានចាត់សត្ត ថាដេ ឲ្យទៅក្រុងអេដេសា (Edessa) ដែលជាទីកំណើតរបស់លោក តាមសេចក្ដីសន្យាដែលព្រះអង្គបានមានបន្ទូលទៅកាន់អាប់ហ្គារ (Abgar) នៅពេលដែលព្រះអង្គប្រទានកន្សែងដែលមានព្រះភក្ត្ររបស់ព្រះអង្គ (ជារូបអាយខនរបស់ព្រះអម្ចាស់ «ដែលមិនមែនធ្វើដោយដៃមនុស្ស» ដែលមានរំលឹកនៅថ្ងៃទី១៦កក្កដា)។ នៅពេលព្រះអង្គម្ចាស់អាប់ហ្គារគោរពកន្សែងនោះ គាត់បានជាសះស្បើយពីជំងឺឃ្លង់ ប៉ុន្តែមិនទាន់ជាសះស្បើយទាំងស្រុង (នៅសល់ស្នាមជំងឺតិចតួចនៅលើព្រះភក្ត្រ)។
នៅពេលសត្ត ថាដេ បានចូលជួបអាប់ហ្គារ អង្គម្ចាស់នេះបានទទួលគាត់ដោយអំណរគុណខ្លាំង។ គ្រីស្ទទូតរបស់ព្រះគ្រិស្ត នេះបានបង្រៀនគាត់អំពីសេចក្ដីជំនឿពិត ហើយបន្ទាប់មកបានធ្វើពិធីជ្រមុជទឹកដល់គាត់។ ពេលអាប់ហ្គារក្រោកពីទឹកជ្រមុជ គាត់បានជាសះស្បើយទាំងស្រុង។ ដោយសរសើរតម្កើងព្រះជាម្ចាស់ អាប់ហ្គារក៏បានសំរេចចិត្តឲ្យប្រជាជនរបស់គាត់ស្គាល់ព្រះពិត និងថ្វាយសិរីល្អដល់ព្រះអង្គ។ គាត់បានប្រមូលប្រជាជនទាំងអស់នៃក្រុងអេដេសា ឲ្យមកស្ដាប់ការបង្រៀនរបស់សត្ត ថាដេ អំពីព្រះគ្រិស្ត។ កាលបើពួកគេបានស្ដាប់ពាក្យរបស់គ្រីស្ទទូតនេះ និងឃើញព្រះអង្គម្ចាស់របស់ពួកគេជាសះស្បើយដោយអព្ភូតហេតុអស្ចារ្យ ពួកគេបានបោះបង់ព្រះក្លែងក្លាយ និងរបៀបរស់នៅមិនបរិសុទ្ធ ហើយទទួលយកជំនឿគ្រិស្ទាន ហើយបានទទួលពិធីបុណ្យជ្រមុជទឹក។ ដូច្នេះ ក្រុងអេដេសាបានភ្លឺរុងរឿងដោយជំនឿគ្រិស្តសាសនា។
អាប់ហ្គារបាននាំមាសជាច្រើនមកថ្វាយដល់គ្រីស្តទូត ប៉ុន្តែសត្ត ថាដេ បានមានប្រសាសន៍ទៅគាត់ថា៖
«ដោយយើងបានលះបង់មាសរបស់យើងខ្លួនឯងហើយ តើយើងនឹងទទួលមាសអ្នកដទៃធ្វើអ្វី?»
សត្ត ថាដេ បានឃោសនាដំណឹងល្អនៅទូទាំងស៊ីរី (Syria) និងភេនីស (Phoenicia)។ លោកបានសោយទិវង្គតនៅក្រុងបេរុត (Beirut) ក្នុងដែនដីភេនីស។
ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ) 