ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

ហាក្គាយ កើតនៅក្នុងទីក្រុងបាប៊ីឡូន (Babylon) ក្នុងអំឡុងពេលអ៊ីស្រាអែលជាប់ជាឈ្លើយសឹក។ លោកមកពីវង្សត្រកូលលេវី (Levi) ហើយបានព្យាករណ៍ប្រហែល ៤៧០ ឆ្នាំមុនព្រះគ្រិស្ត។ ពេលនៅជាកុមារ លោកបានទៅទស្សនាទីក្រុងយេរូសាឡិម (Jerusalem)។ លោកបានលើកទឹកចិត្ត ហ្សេរូបបាបែល (Zerubbabel) និង យ៉ូស្វេ (Joshua) ដែលជា បូជាចារ្យ ឱ្យស្ដារព្រះវិហារនៃព្រះអម្ចាស់ឡើងវិញ នៅយេរូសាឡិម ដោយព្យាករណ៍ថាព្រះវិហារនេះនឹងមានសិរីរុងរឿងធំជាងព្រះវិហារមុនរបស់សូឡូម៉ូន (Solomon) «សិរីរុងរឿងនៃផ្ទះក្រោយនេះនឹងធំជាងផ្ទះមុន ដូចជាព្រះអម្ចាស់នៃឣ្វីៗទាំងឣស់បានមានបន្ទូល» (ហាក្គាយ ២:៩) ព្រោះព្រះអម្ចាស់ និងព្រះអង្គសង្គ្រោះនឹងបង្ហាញខ្លួននៅក្នុងព្រះវិហារថ្មីនេះ។

លោកបានរស់នៅយូរគ្រប់គ្រាន់ដើម្បីឃើញ ផ្នែកមួយនៃព្រះវិហារដែលសាងសង់ដោយ ហ្សេរូបបាបែល។ លោកបានទទួលមរណក្នុងវ័យចំណាស់ ហើយបានចូលរួមជាមួយបុព្វបុរសរបស់លោក។