ព្រះសហគមន៍គ្រិស្តសាសនា ឣូតូដុក ប្រចាំនៅប្រទេសកម្ពុជា (តំណាងព្រឹទ្ធាចារ្យមូស្គូវ)

នៅក្នុងព្រះសហគមន៍ គ្រិស្តអូតូដុក្ស ពួកយើងហៅ សប្តាហ៍ចុងក្រោយនៃជីវិតរបស់ព្រះគ្រីស្ទ ថាជា សប្តាហ៍នៃទុក្ខលំបាក ឬហៅថា សប្តាហ៍ពិសិទ្ធ​ តាមពាក្យពេញនិយម។ ថ្ងៃនីមួយៗត្រូវបានហៅថា “អស្ចារ្យ និងពិសិទ្ធ”​ ក្នុងសៀវភៅពិធីបុណ្យ​ ហើយក្នុងសប្តាហ៍នេះ ព្រះសហគមន៍ ប្រារពពិធីបុណ្យ ពិសេស ជារៀងរាល់ថ្ងៃ។​ គ្រិស្ទាន​ ផ្អាកជីវិតលោកិយរបស់ពួកគេ ដើម្បី “ឡើងទៅជាមួយព្រះអម្ចាស់ទៅកាន់ក្រុងយេរូសាឡឹម” (ចំរៀងទំនុកដំកើង ម៉ាទីននៃថ្ងៃច័ន្ទពិសិទ្ធ) 

ថ្ងៃនិមួយៗនៃសប្តាហ៍ពិសិទ្ធ មានអត្ថន័យផ្សេងៗគ្នា។ អត្ថន័យនៃថ្ងៃច័ន្ទគឺដើមល្វាដែលគ្មានផ្លែ ហើយត្រូវបានដាក់ទោស។ សំរាប់ ថ្ងៃអង្គារ ចំនុចសំខាន់ជាងគេ គឺលើការប្រុងប្រយ័ត្នរបស់ពួកស្រីក្រមំុឈ្លាស​វៃ ដែលមិនដូចបងប្អូនស្រីឥត​គំនិតរបស់ពួកគេទេ ប៉ុន្តែពួកនាងបានត្រៀមខ្លួនរួចរាល់នៅពេលដែលព្រះអម្ចាស់យាងមករកពួកគេ។

សំរាប់ថ្ងៃពុធ ចំនុចសំខាន់គឺអំពី ស្ត្រីដែលបានប្រព្រឹត្តអំពើបាប​ ប៉ុន្តែបានកែប្រែចិត្តគំនិត។ ប៉ុន្តែចំនុចសំខាន់ជាងនេះទៅទៀតនោះគឺ ការប្រៀបធៀបរវាងស្រីពេស្យា ដែលត្រូវបានព្រះសង្គ្រោះ និងលោកយូដាសដែលជាគ្រិស្តទូត ដែលព្រះគ្រិស្តបានជ្រើសរើស​ ប៉ុន្តែមិនត្រូវបានព្រះសង្គ្រោះ។​
នាងស្រីពេស្យា ប្រគល់ទ្រព្យសម្បត្តិរបស់នាងទៅព្រះគ្រីស្ទ ហើយថើបជើងរបស់ទ្រង់។ រីឯ យូដាសក្បត់ព្រះគ្រីស្ទដោយថើបទ្រង់ ដើម្បីលុយ។

ក្នុងអំឡុងពេលបីថ្ងៃដំបូងនៃសប្តាហ៍ពិសិទ្ធ ព្រះសហគមន៍ អាន ព្រះគម្ពីដំណឹងល្អទាំងបួន ពីដើមរហូតដល់ចំណុចដែល ព្រះគ្រិស្តចាប់ផ្តើមទទួលរងទុក្ខ ។ បើអានព្រះគម្ពីដំណឹងល្អទាំង៤មិនបាន ព្រះសហគមន៍នឹងព្យាយាមអានព្រះគម្ពីដំណឹងល្អយ៉ាងហោចណាស់មួយសៀវភៅពីដើមដល់ចប់ មុនថ្ងៃព្រហស្បតិ៍ពិសិទ្ធ។